Biri var idi, biri yox idi.
Çox-çox əvvəllər, uzaq Hindistan cəngəlliklərində bir fil balası yaşayırdı. Onun bir dostu var idi — dovşan. Dovşan çox iri idi, amma əlbəttə ki, fildən xeyli kiçik idi. Boylarının fərqli olmasına baxmayaraq, dovşanla fil çox yaxın dost idilər və müxtəlif oyunlar oynamağı çox sevirdilər.
Bir gün dovşan fil balasından soruşdu:
— Görəsən, ikimizdən hansı daha böyükdür: sən, yoxsa mən?
Bu axmaq sualı eşidəndə fil balası az qala yediyi bananla boğulacaqdı.
— Yəqin zarafat edirsən! — deyə o, təəccüblə səsləndi. — Barmaqlarının ucunda dayansan belə, güclə mənim dizimə çata bilərsən.
Amma dovşan sözündən dönmədi:
— Sən elə düşünürsən! Mən isə səndən böyük olduğumu deyirəm. Buna görə də kimin haqlı olduğunu müəyyənləşdirmək üçün bizə hakim lazımdır. Razısan?
— Əlbəttə! — deyə fil balası dostunun bu sualına hələ də təəccüblənərək cavab verdi.
— Onda gedək insanların yaşadığı kəndə, onlardan soruşaq. Onlar bütün heyvanlardan ağıllıdır və ən yaxşı hakimlərdir!
Onlar kəndə tərəf yollandılar. Bir az sonra insanlarla qarşılaşdılar. İnsanlar bu qeyri-adi cütlüyü birlikdə görəndə öz aralarında danışırdılar:
— Bu balaca fil balasına baxın! Nə qədər kiçikdir, elə deyilmi?
— Bəli, hələ balacadır, amma tezliklə böyüyəcək, — deyə başqa biri cavab verdi.
Sonra kimsə dovşanı gördü.
— Baxın, necə də nəhəng dovşandır! — deyə hamı qışqırdı.
Dovşan sevincindən sinəsini qabağa verərək fil balasının önündə qürurla addımlamağa başladı. İnsanların yanından keçərkən onların heyranlıqla dediklərini eşidirdi:
— Pəncələrinə baxın! Qulaqları da nə böyükdür! Biz indiyədək belə iri dovşan görməmişik!
Dovşan bu sözləri eşidəndə dostuna tərəf çevrilib dedi:
— İndi evə qayıda bilərik. Artıq kimin böyük olduğuna qərar verdilər! Mən nəhəngəm, sən isə balacasan!
Fil balası kədərlə başını buladı. O başa düşdü ki, dovşan onu hiylə ilə aldadıb. Cəngəlliyə qayıdarkən fil balası dovşanı ötüb keçdi, ayağını yuxarı qaldırdı, dovşanın boyu filin dizinə güclə çatırdı və fil dedi:
— Ehtiyatlı ol! Yoxsa bu balaca fil balası indicə dünyanın ən böyük dovşanını tapdalayar!
