Böyükdişin iri və iti dişləri vardı, amma onları fırçalamağa həmişə tənbəllik edirdi. Bir gün ağrıyan dişi ona vacib bir dərs verdi!
Dərin, mavi okeanda Böyükdiş adlı şən bir balaca köpəkbalığı yaşayırdı. Onun çoxlu ağappaq, iri və iti dişləri vardı. Böyükdiş delfinlərlə tutdu-qaçdı oynamağı və ləzzətli yengəcləri xırçıldada-xırçıldada yeməyi çox sevirdi. Amma bir problemi vardı — dişlərini fırçalamaq istəmirdi.
Hər səhər anası ona yaşıl yosunlardan hazırlanmış yumşaq bir diş fırçası verirdi. Böyükdiş isə narazılıqla üzünü çevirirdi:
— İstəmirəm! Fırçalamayacağam! Bu, çox vaxt aparır, həm də darıxdırıcıdır! — deyə naz edir, sonra da balaca balıqlarla oynamaq üçün sürətlə üzüb gedirdi.
Bir gün Böyükdiş qumun içində böyük, gözəl bir daş gördü. Daşı götürüb düşündü:
“Hmm! Mən hələ belə bir şeyin dadına baxmamışam!”
Sonra daşdan bir tikə dişləməyə çalışdı.
Az qaldı dişini sındırsın! Böyükdiş yanağını tutub daşı hirslə kənara atdı və tez oradan uzaqlaşdı.
Axşam balaca köpəkbalığı yatmağa getdi. Yuxusunda gözəl bir mərcan rifi gördü. Rifin arxasında gizlənib dəniz atlarını seyr edirdi.
Səhər isə Böyükdiş güclü ağrıdan oyandı.
Onun sevimli qabaq dişi bərk ağrıyırdı. Yazıq balaca nə gülümsəyə, nə oynaya, nə də səhər yeməyini yeyə bilirdi. Gözlərindən duzlu göz yaşları süzülürdü.
— Ana! — deyə səsləndi və kömək istəmək üçün anasının yanına üzdü.
Anası onu dərhal müdrik həkim Ahtapotun yanına apardı. Həkim qolları ilə ağrıyan dişi sehrli dəniz məcunu ilə ehtiyatla təmizlədi və başını yellədi:
— Ay balaca! Bu gün bəxtin gətirib: dişlərinin arasında balaca bir daş parçası ilişib qalıb. Daşları dişləmək olmaz, dişini zədələyə bilərsən! Dişlərin çox güclüdür, amma onları düzgün təmizləməsən, zərərli mikroblar dişlərinə hücum edər. Bu qaydanı yadda saxla: dişlərini gündə iki dəfə — səhər və axşam fırçala!
— Çox sağ olun, həkim! — deyə Böyükdiş təşəkkür etdi. — Bundan sonra dişlərimə yaxşı qulluq edəcəyəm və onları fırçalamağa heç vaxt tənbəllik etməyəcəyəm! İstəyirəm ki, dişlərim sağlam olsun və ağrımasın!
Böyükdiş hər şeyi başa düşdü və o gündən daha naz etmədi. İndi hər səhər və hər axşam diş fırçasını özü götürür, bütün dişlərini səylə təmizləyirdi.
O gündən Böyükdişin dişləri bir daha ağrımadı. Onun xoşbəxt təbəssümü isə bütün okeanın ən parlaq təbəssümü oldu!
Puçi hər həftə yeni nağıl seçir — bölmələrə bax və sevimlini tap.
Bütün nağıllarÖvladınız üçün audio və video nağıllar. Təsəvvürü inkişaf etdirir və yaxşılığa öyrədir.
Bütün MOKA dünyası bir toxunuş uzaqlıqda
