Üç ayı

Bir balaca qız evdən çıxıb meşəyə getdi. Meşədə azdı və evə qayıtmaq üçün yol axtarmağa başladı. Amma yolu tapa bilmədi. Gəlib meşədəki balaca bir evə çıxdı.

Evin qapısı açıq idi. Qız içəri boylandı, gördü ki, evdə heç kim yoxdur. O da içəri girdi.

Bu evdə üç ayı yaşayırdı. Ata ayının adı Mixail İvanoviç idi. O, iri və tüklü idi. Ana ayı ondan bir az balaca idi. Onun adı Nastasya Petrovna idi. Üçüncüsü isə Mişutka adlı balaca ayı balası idi. Ayılar evdə yox idilər, meşəyə gəzməyə getmişdilər.

Evdə iki otaq vardı: yemək otağı və yataq otağı. Qız yemək otağına girəndə masanın üstündə şorba ilə dolu üç kasa gördü. Birinci kasa çox böyük idi və ata ayıya məxsus idi. İkinci, bir az kiçik kasa ana ayının idi. Üçüncü, balaca mavi kasa isə Mişutkanın idi. Hər kasanın yanında bir qaşıq vardı: böyük, orta və balaca.

Qız əvvəlcə ən böyük qaşığı götürüb böyük kasadakı şorbadan daddı. Sonra orta qaşığı götürüb orta kasadakı şorbadan içdi. Axırda isə balaca qaşıqla mavi kasadakı şorbadan daddı. Mişutkanın şorbası ona hamısından dadlı gəldi.

Qız oturmaq istədi. Masanın yanında üç stul gördü. Böyük stul ata ayının, bir az kiçik stul ana ayının, üstündə mavi yastıq olan balaca stul isə Mişutkanın idi.

Qız böyük stula çıxmaq istədi, amma yıxıldı. Sonra orta stulda oturdu, ancaq orada rahat deyildi. Axırda balaca stulda oturdu və sevincək güldü. Bu stul çox rahat idi!

Qız mavi kasanı dizlərinin üstünə qoyub şorbanı yeməyə başladı. Şorbanın hamısını yeyib qurtarandan sonra stulda irəli-geri yelləndi.

Birdən balaca stul sındı və qız yerə yıxıldı. Qız ayağa qalxdı, stulu yerdən qaldırdı və o biri otağa keçdi.

Orada üç çarpayı vardı. Böyük çarpayı ata ayının, orta çarpayı ana ayının, balaca çarpayı isə Mişutkanın idi.

Qız böyük çarpayıya uzandı, amma çarpayı ona həddindən artıq geniş gəldi. Orta çarpayıya uzandı, bu isə çox hündür idi. Sonra balaca çarpayıya uzandı. Bu çarpayı lap ona görə idi! Qız elə oradaca yuxuya getdi.

Bir az sonra ayılar evə qayıtdılar. Acmışdılar və yemək istəyirdilər.

Ata ayı kasasını götürüb içinə baxdı və qalın, qorxunc səslə nərildədi:

— Mənim kasamdan kim şorba içib?!

Ana ayı da öz kasasına baxıb bir az alçaq səslə nərildədi:

— Mənim kasamdan kim şorba içib?!

Mişutka isə boş kasasını görüb nazik səslə çığırdı:

— Mənim kasamdan kim şorba içib? Hamısını da yeyib qurtarıb!

Ata ayı stuluna baxıb qalın, qorxunc səslə nərildədi:

— Mənim stulumda kim oturub, onu yerindən tərpədib?!

Ana ayı da stuluna baxıb bir az alçaq səslə nərildədi:

— Mənim stulumda kim oturub, onu yerindən tərpədib?!

Mişutka isə sınmış stuluna baxıb nazik səslə çığırdı:

— Mənim stulumda kim oturub, onu sındırıb?!

Ayılar yataq otağına keçdilər.

— Mənim yatağımda kim uzanıb, onu əzib?! — ata ayı qalın, qorxunc səslə nərildədi.

— Mənim yatağımda kim uzanıb, onu əzib?! — ana ayı bir az alçaq səslə nərildədi.

Mişutka isə balaca bir kətili çarpayısının yanına çəkdi, üstünə çıxıb yatağına boylandı və nazik səslə çığırdı:

— Mənim yatağımda kim uzanıb?!

Birdən qızı gördü və var gücü ilə qışqırdı:

— Budur! Tutun onu, tutun! Buradadır! Buradadır! Ay-ay-ay! Tutun!

Mişutka qızı dişləmək istədi. Qız gözlərini açdı, ayıları görən kimi pəncərəyə tərəf qaçdı.

Pəncərə açıq idi. Qız pəncərədən bayıra atılıb qaçdı. Ayılar isə ona çata bilmədilər.